Pietro II giudice di Arborea, e i prelati e nobili del suo regno prestano giuramento di fedeltà alla Chiesa Romana, e promettono di prestare obbedienza agli ordini del Sommo Pontefice, e del suo Legato.

(1237, 9 aprile).

Dal Muratori, Antiq. Ital., Tom. VI. Dissert. LXXI.

In nomine Domini nostri Iesu Christi. Hoc est exemplum cuiusdam publici instrumenti, pendenti sigillo plumbeo signati, huius tenoris.

In nomine Domini. Amen. Anno Domini millesimo ducentesimo trigesimo septimo, indictione XI. tempore domini Gregorii IX. Papae, anno XI. nono die exeunte mensis aprilis. Dominus Petrus Iudex Arboreae, tactis sacrosanctis evangeliis, publice iuravit sine fraude, dolo, ac malo ingenio stare, parere, et in omnibus obedire generaliter et praecise, et sine conditione aliqua mandatis domini Papae, quae et quot dominus Papa per se vel per nuntios sive per literas suas, vel quae Magister Alexander Capellanus et Legatus Apostolicae Sedis per se vel per nuntios sive per literas suas ei fecerit pro domino Papa, et Ecclesia Romana, et ea in omnibus et per omnia idem iudex promisit observare et facere a suis subditis observari.

Eodem die, et eodem loco dominus Laurentius de Zurri, dominus Guantinus, dominus Petrus de Martino, dominus Arzoccus de Martis, nobiles, iuraverunt et promiserunt, quod dabunt Iudici Petro consilium, auxilium et favorem ad facienda, et servanda omnia mandata et praecepta domini Papae, et ipsius Legati, quae ei fecerint per se vel per nuntios sive per literas suas. Et si dictus iudex ea non fecerit, ipsi omnia facere promiserunt quaecumque eis dominus Papa iniunxerit facienda.

Actum in camera domus ecclesiae Sanctae Mariae de Bonarcanto, coram dominis Trogodorio Archiepiscopo Arborensi, Petro Episcopo Sanctae Iustae, Nicolao Priore Sanctae Mariae de Bonarcanto, Lamberto Abbate de Falesia, Gunnario Archipresbytero Aristani, Magistro Benencasa Canonico Sancti Michaëlis Lucensis, Benedicto Clerico Alatrino, Iohanne Lombardo, praesentibus clericis, nobilibus, et multis aliis.

Sequenti vero die simili modo iuraverunt nobiles, videlicet Petrus de Ficu Armentarius, Comita de Zurri, Parasone Pinna, Guantinus de Martis, Comita Spanu, Furatus Zurrumpa, Barasone Pistoris: quod dabunt eidem iudici Petro Arborensi consilium, auxilium et favorem ad facienda et servanda omnia mandata domini Papae, et supradicti Legati, quae ei fecerint per se vel per nuntios sive per literas suas.

Actum in eodem loco, coram subscriptis testibus et multis aliis clericis et laicis.

Ego Gregorius sacrosanctae Romanae Ecclesiae Scriniarius, iis omnibus interfui, et de mandato dicti Magistri Alexandri Capellani et Legati Apostolicae Sedis, scripsi et complevi, meoque signo signavi, et in publicam formam redegi.

Et ego Petrus Iudex Arboreae ad perpetuam memoriam praesens instrumentum mei feci sigilli munimine roborari.

Et ego Nicolaus Ferentinus, sanctae Romanae Ecclesiae Scriniarius, sicut inveni in publico et authentico instrumento, pendenti plumbeo sigillo signato, auctoritate Sedis Apostolicae ita de verbo ad verbum exemplavi, nihil immutando, et signum feci.