Li suddetti abati di Telieto, e di S. Gargano ingiungono ai Pisani e ai Genovesi di osservare fedelmente la pace nei tempi, luoghi e modi stabiliti dalla precedente sentenza, e di denunziarla ai loro concittadini, di restituirsi le cose toltesi a vicenda per mare e per terra, e di rimettersi concordemente i danni e le ingiurie reciproche.

(1209, 26 aprile).

Dai Regii Archivi di Corte di Torino, Genov. Docum. ant. mazz. 2. N° 6.

In nomine Domini amen. Cum convenissent viri venerabiles Girardus de Telieto et Galganus de Sancto Gargano abbates pro reformatione pacis et concordie inter Pisanos et Ianuenses apud Ilicem, presentibus viris venerabilibus Luterio archiepiscopo Ianuense, Gualterio episcopo Lunensi, partibus in eorum presentia constitutis, scilicet nobili viro Gotfredo vicecomite Pisanorum potestate, et viris nobilibus Wilielmo Embriaco, Idone de Carmadino, Oberto Usumaris, Henrico de Nigro, consulibus Ianuensibus pro communi civitatum ipsarum, predicti abbates, qui iamdudum fuerant a civibus civitatum ipsarum de omnibus controversiis que inter eos erant arbitri constituti, preceperunt istis potestati Pisanorum et consulibus Ianuensibus ut iurarent stare mandatis eorum abbatum pro comuni suarum civitatum sicut eorum antecessores iuraverant, et statim ipsi iuraverunt sicut eis fuerat imperatum, preceperunt eisdem rectoribus ut ea que ablata sunt hinc inde a die compromissionis facte in eos abbates usque nunc ab hominibus predictarum civitatum et districtum earum restitui faciant usque ad kalendas augusti proximas vel antea si poterint bona fide, et nominatim navem illam Pisanorum que capta fuit in mari Mortuo ab his qui manent apud Siracusam. Item preceperunt ut de omnibus dampnis rapinis et iniuriis hinc inde factis usque ad diem compromissi faciant sibi finem, et refutationem et irrevocabilem pacem, et pactum de non petendo, salvo eo quod suprascripti abbates concordes dicere voluerint. Qui vero isti Gotefredus potestas Pisanorum per se et suos successores nomine comunis civitatis Pisane et eius districtus, et Wilielmus Embriacus, Ido de Carmadino, Obertus Usumaris et Henricus de Nigro consules Ianuenses per se et eorum successores nomine comunis Ianue et eius districtus sibi ad invicem de omnibus dampnis rapinis iniuriis hinc inde factis usque ad diem compromissi de precepto istorum abbatum ibi publice finem et refutationem et irrevocabilem pacem et pactum de non petendo fecerunt, salvo eo quod isti abbates concordes dicere voluerint. Item preceperunt Ianuenses ut iuramenta que de non petendo castro Bonifacii prestitisse dicuntur ulterius non fiant neque renoventur. Lata vero sententia preceperunt ut usque in kalendas iunii proximas mittat queque civitas istarum per regiones in quibus noverint esse Pisanos et Ianuenses, et denuntiare eis pacem districte precipiendo ut eam pacem inter se firmam servent, et illibatam ubique in terra et in mari tam in rebus quam in personis et omnibus modis. Item statuerunt terminum Ianuensibus eundi ad Bonifacium usque ad quindecim dies proximos vel  ante si ipsis abbatibus videbitur oportunum aut si aliquod impedimentum intervenirent ad eorum voluntatem. Acta sunt apud Ilicem presentibus domino Luterio Pisano Archiepiscopo. domino Ottone Ianuensi Archiepiscopo. Gualterio Lunensi Episcopo. Rubeo de Notta. Guidone Spinula. Iohanne Advocato. Lanfranco de Turca. Wilielmo Malocello. Lanfranco Rubeo. Nicola Barbavara. Wilielmo Denigro. Ugone Embriaco. Surleone. Nicola Embriaco. Nobilibus civibus Ianue. Guidone de Cassino. Bolso iudice. Lotterio. Magistro Bartholomeo. Tedisio Comite. Guelfo Ligerio Pancaldi. Pellario. Lanfranco de Bonacurso. Nobilibus civibus Pisanis. Lucca, Abbate Sancti Pauli. Magistro Raimundo Canonico. Iacobo Abbate Sancti Michaelis discalciatorum, et aliis multis.

Anno a nativitate eius millesimo ducentesimo nono. Indictione undecima. Sexto kalendas madii scilicet die Dominico.

Ego prefectus domini Imperatoris et Lunensis curie notarius his omnibus interfui et de precepto istorum Abbatum scripsi etc.

Guglielmus quondam Bonijohannis notarius hanc cartam transcripsi et exemplificavi ex autentico scritpo per manum dicti prefecti sicut in eo reperi et legi, nil addito dempto vel diminuto. Anno nativitatis millesimo ducentesimo nono inditione undecima die quarta madii inter terciam, et nonam.