L’Imperatore Ottone IV riceve sotto la sua protezione l’eremo di Camaldoli, e i beni, luoghi e monisteri dal medesimo dipendenti, fra i quali sono nominati quelli esistenti in Sardegna.

(1209, 6 novembre).

Dal Mittarelli, e Costadoni, Annal. Camald. – Append. tom. IV, col. 283 e  seg.

In nomine sancte et individue Trinitatis. Otto quartus divina favente clementia Romanorum imperator et semper Augustus. Cum omnibus ecclesiasticis personis et viris religiosis imperialem favorem clementer impendere teneamur, eorum precipue utilitatibus intendere omnino debemus, quorum nos orationibus commendamus humiliter et devote, et quos fervens religio et honesta conversatio serenitati nostre speciali devotione commendatos reddunt plurimum et acceptos. Attendentes igitur religionem et devotionem Camaldulensis ordinis omnium tam futurorum quam presentium Christi imperiique nostri fidelium scire volumus industriam, qualiter nos pro remedio anime nostre et omnium parentum nostrorum, et quia eorum orationibus devote et humiliter commendamus, sanctam Camaldulensem eremum cum toto suo conventu et cum universis suis locis et possessionibus et rebus atque pertinentiis, quas nunc habent, vel in posterum concedente Domino iuste poterunt adipisci, in specialem nostre maiestatis protectionem recepimus, dignum et congruum decernentes predicti conventus monasterium, et quorundam locorum eremi prefate nomina singulariter inferius annotare etc…

In insula Sardinie Monasterium Sancte Trinitatis de Sacraria, Ecclesiam Sancte Eugenie de Samanar, Ecclesiam Sancti Michaelis, et Sancti Laurentii in Vanari, Ecclesiam Sancte Marie, et Sancti Iohannis in Altasar, Ecclesiam Sancte Marie in Contra, Ecclesiam Sancti Iohannis et Sancti Simeonis in Salvenero, Ecclesiam Sancti Nicolai de Trulla, Ecclesiam Sancti Petri in Scano, Ecclesiam Sancti Pauli in Cotrognano, Ecclesiam Sancti Petri in Olim et Monasterium in Orrea etc…

Signum domini Ottonis quarti Romanorum imperatoris invictissimi.

Ego Conradus Spirensis episcopus imperialis aule cancellarius vice domini Theodorici Coloniensis archiepiscopi, et totius Italiae archicancellarii recognovi.

Acta sunt hec anno Dominice incarnationis M.CC.IX. indictione XIII. regnante Domino Ottone IV Romanorum imperatore gloriosissimo anno imperii eius primo.

Data apud Ficiclum VIII idus novembris per manum Gualterii protonarii.