Mariano IV Giudice di Arborea, Conte di Goceano, e Visconte di Basso, emancipa dalla sua patria podestà Ugone suo figlio primogenito.

(1355, 14 marzo).

Dai Regii Archivi di Barcellona, Armar. VIII. Sardiniae, Num. XCVII.

Marianus Dei gratia Iudex Arboreae, Comes Gociani, et Vicecomes de Basso. Illi digne merentur eximi a patria potestate, quibus tam morum gravitas, quam aetatis discretio suffragantur. Sane attendentes haec in persona vestri nobilis, et dilecti primogeniti nostri Hugonis de Arborea (1) laudabiliter ab experto vigere, operante clementia Salvatoris; quin etiam advertentes vos nobis cum debita reverentia multipliciter supplicasse, ut vos eximere dignaremur a vinculo nostrae patriae potestatis; ideo Nos benigniter annuentes vestris supplicationibus in hac parte, ubi probabiliter experimur vestram personalem industriam, et virtutes, quae vos reddunt in hujusmodi exemptionis obtentu satis dignum, satisque habilem, et capacem, vos in Dei nomine, et benedictione paterna, ex certa nostra scientia, observatis modis, et solemnitatibus consuetis, emancipamus, eximimus, et penitus relaxamus a jugo nostrae patriae potestatis, omni scilicet modo, jure, ratione, causa, et forma, quibus melius et efficacius possumus, et debemus. Constituentes thenore praesentis cartae, ut sitis, et esse debeatis amodo juris vestri, et quod omnia, et singula, comuniter, et divisim libere agere, administrare, facere, gerere, exequi, et exercere possitis in judiciis, sive extra, sine contradictione nostra, et alterius cujuscumque, quae quilibet homo juris sui, et unusquisque paterfamilias in quibuscumque actibus publicis, legitimis, et privatis facere potest, et debet. In cuius rei testimonium, et vestri cautelam fieri mandavimus presens publicum instrumentum per notarium infrascriptum. Quod fuit actum Arestani, quarto decimo die mensis martii, anno Dominicae Incarnationis millesimo tercentesimo quinquagesimo quinto, praesentibus nobili viro Ro… ab… o de Berardo de Marsilia, Magistro Iacobo Physico, Geraldo de Flassano, Petro de Açene, Barsolo Cathone, et Petrucio de Moguro, testibus ad haec vocatis specialiter, et rogatis.

Guyllermus Marchus de Vita, auctoritate Regia totius regni Sardiniae et Corsicae notarius, praemissis omnibus, dum sic agerentur, interfui, eaque recepi, scripsi, et rogatus clausi.

NOTE

(1) Succedette poi a suo padre Mariano nel regno di Arborea sotto nome di Ugone IV. (Ved. Tola, Dizion. biogr. dei Sardi ill., Vol. II, pag. 228 e Vol. III. pag. 277 e seg.).