Pietro IV Re di Aragona fa atto di vassallaggio, e presta omaggio ligio e giuramento di fedeltà pel regno di Sardegna al Pontefice Innocenzo VI.
(1353, 5 ottobre).
Dal Lunig, Cod. Ital. Diplom. Tom. IV. col. 1395-1396.
Sanctissimo ac beatissimo in Christo Patri et Domino, Domino Innocentio divina providentia Sacrosanctae Romanae et universalis Ecclesiae summo Pontifici, Petrus Dei gratia rex Aragonum, Valentiae, Majoricarum, Sardiniae et Corsicae, comesque Barchinonae, Rossilionis et Ceritaniae, ejus humilis filius et devotus, pedum oscula beatorum.
Sanctitati vestrae literarum nostrarum serie patefiat quod nos solicite cogitantes, qualiter felicis recordationis Dominus Bonifacius Papa VIII praedecessor vester concessit et dedit illlustrissimo Domino Iacobo clarae memoriae Regi Aragonum avo nostro, suisque haeredibus in feudum perpetuum regnum Sardiniae et Corsicae cum juribus et pertinentiis sub certo servitio, certisque conditionibus conscriptis plenius in Papali rescripto super hujusmodi concessione et donatione confecto tenorem qui sequitur continentem: – Bonifacius Episcopus etc. (1) et attendentes quod nos, qui ut universalis et legitimus haeres Serenissimi Domini Regis Alphonsi filii et successoris dicti Regis Iacobi felicis recordationis inclyti avi nostri, in dicto Sardiniae et Corsicae regno eidem Domino genitori nostro successimus juxta formam et conditiones in rescripto dictae donationis contentas Sanctissimo in Christo Patri ac Domino, Domino Benedicto divina providentia eiusdem Sanctae Romanae Ecclesiae summo Pontifici praedecessori vestro homagium ligium, vassallagium plenum, et fidelitatis juramentum ut tenebamur personaliter praestitimus, et alia fecimus et complevimus, quae juxta tenorem rescripti praeinserti facere et complere tenebamur; prospicientes insuper, quod juxta formam praeinserti rescripti Papalis ex quo semel personaliter praedicta homagium ligium, vassallagium plenum et fidelitatis juramentum praestitimus, alia ex tunc propter novam successionem vestram et alterius summi Pontificis in vita nostra concurrentia possumus per procuratorem seu procuratores nostros ad praedicta legitime constitutos sanctitati vestrae facere et praestare, ob quod juxta formam praeinserti rescripti sanctissimo in Christo Patri ac Domino, Domino Clementi, divina providentia sacrosanctae Romanae, ac universalis Ecclesiae summo Pontifici, praedecessori vestro immediato, homagium ligium, et vassallagium plenum, ac fidelitatis juramentum per nostros speciales procuratores in nova sua creatione nos recolimus praestitisse: idcirco in nova creatione vestra volentes implere conditiones jam dictas, viso, lecto, et plenarie intellecto dicto Papali rescripto donationis dicti regni Sardiniae et Corsicae supra inserto, Lupum de Gurrea, et Bernardum de Thous milites et consiliarios nostros, dilectos nuntios, et procuratores nostros ad praestandum vice et nomine nostro vobis dicto Domino summo Pontifici et Romanae Ecclesiae homagium ligium, plenum vassallagium, et fidelitatis juramentum pro dicto regno Sardiniae et Corsicae legitime constitutos, ad pedes Sanctitatis vestrae providimus destinandos.
Propterea, Sanctissime Pater, has fieri literas patentes bulla nostra aurea bullatas, clementiae vestrae per jam dictos procuratores nostros tradendas decrevimus prout praeinserti rescripti Apostolici tenor inducit: per quas quidem nunc ut ex tunc modos, conventiones, conditiones, tenorem et formam in dicto Papali rescripto conscriptos acceptamus expresse: dictum regnum Sardiniae et Corsicae a dicto Domino Papa Bonifacio et Romana Ecclesia praefatum Dominum Regem Iacobum pro se et successoribus suis haeredibus recepisse in feudum sub conditionibus, conventionibus, modo et forma, atque tenore, quae in dicto eiusdem Domini Papae Bonifacii praedecessoris vestri rescripto continentur. Quos tenorem, modum, conventiones, conditiones, et formam promittimus nos inviolabiliter servaturos. Pro quorum observantia nos et dictum regnum Sardiniae et Corsicae jura et bona nobis in eo competentia et competitura obligamus. Datum Valentiae quinta die octobris, anno a nativitate Domini MCCCLIII.
NOTE
(1) Siegue per intiero la bolla di concessione della Sardegna fatta da Papa Bonifacio VIII a Don Giacomo II re di Aragona, che abbiamo riportato più sopra tra le Carte e Diplomi del Secolo XIII. Num. CXXXVIII. pag. 456.