Il Pontefice Benedetto XII scrive ad Alfonso re di Aragona di avere investito il di lui procuratore del regno di Sardegna, e di Corsica, e di avere ricevuto dal medesimo il consueto giuramento ed omaggio.
(1335, 20 dicembre).
Dal Lunig. Cod. Ital. Diplomat. Tom. IV. col. 1389-90.
Alphonso Aragoniae, Sardiniae et Corsicae regi illustri. Nuper infra annum, postquam divina faciente clementia in romanum fuimus electi Pontificem, tu qui clarae memoriae Iacobo Aragoniae, Sardiniae et Corsicae regi genitori tuo in huiusmodi regnis, utpote eius haeres legitimus successisti prudenter attendens, quod iuxta formam et conditiones contentus in literis felicis recordationis Bonifacii Papae VIII. praedecessoris nostri confectis de collatione, concessione, et donatione dicti regni Sardiniae et Corsicae, dicto Iacobo regi, suisque haeredibus ex suo, et haeredum suorum corporibus legitime descendentibus factis per praedecessorem eundem, fidelitatem, vassallagium plenum, et homagium ligium, ac iuramentum facere, et praestare nobis, et Romanae Ecclesiae tenebaris; dilectum filium nobilem virum Ferrarium de Caneto militem procuratorem, nuntium, ambasciatorem, et consiliarium tuum, ad hoc a te speciale mandatum habentem, propter hoc ad sedem Apostolicam specialiter destinasti nobis, et Romanae Ecclesiae per dictum procuratorem pro eo, quod fidelitatem vassallagium, et iuramentum huiusmodi piae memoriae Ioanni Papae XXII. praedecessori nostro in persona bonae memoriae Ioannis patriarchae Alexandrini tunc viventis, ex speciali commissione praedecessoris eiusdem per eius speciales literas sibi facta illa recipientis personaliter, praestiteras huiusmodi fidelitatem; homagium facturus, et iuramentum huiusmodi secundum praedictam formam in tuam animam praestiturus.
Licet igitur propter praemissa te a personali praestatione huiusmodi non credamus immunem, cum praedictam fidelitatem, et homagium in praesentia eiusdem Ioannis Papae praedecessoris nostri personaliter non praestiteris, prout forma dictarum literarum eiusdem Bonifacii videtur expressius contineri; quamvis illa eidem Ioanni patriarche remotus, et absens a praesentia romani Pontificis praestanda, et facienda duxeris, ut praefertur; nos tamen, deliberatione super his cum fratribus nostris praehabita, de ipsorum consilio, de speciali gratia, quam hac vice personae tuae facere intendimus, in hac parte a praedicto milite, procuratorio nomine tuo infra dictum annum, quo electi fuimus in romanum Pontificem, videlicet XIIII kalendas ianuarii in consistorio publico, praesentibus eidem fratribus nostris Sancta Romana Ecclesia cardinalibus, et ipsorum consilio, praesente quoque praelatorum, et aliorum fidelium multitudine copiosa, fidelitatem, vassallagium, homagium ligium, et iuramentum praedicta iuxta formam in eisdem literis eiusdem praedecessoris Bonifacii contenta, per dictum militem nobis praestita, et facta, recepimus: ac nihilominus postmodum infra mensem, prout iuxta formam, et conditiones contentas in dictis literis tenebaris (prout per patentes literas tuas aurea tua bulla munitas, quas nobis ad cautelam nostram, et successorum nostrorum romanorum Pontificum, et eiusdem romanae Ecclesiae destinasti, confessus es, et recognovisti expresse) ex gratia et liberalitate eiusdem praedecessoris Bonifacii et romanae Ecclesiae dictum regnum Sardiniae et Corsicae eidem Iacobo regi genitori tuo, ac tibi, tuisque haeredibus fuisse concessum in feudum: et sic dictum genitorem tuum illud recepisse, teque illud tenere sub conditionibus, conventionibus, sive pactis, modo et forma, atque tenore, qui in eiusdem praedecessoris Bonifacii literis continentur. Quos tenorem, modum, conditiones, conventiones, et formam promisisti te inviolabiliter servaturum; pro quorum observantia obligasti te, et eidem regnum Sardiniae et Corsicae, et bona tibi competentia, prout in eisdem literis tuis aurea tua bulla munitis plenius continetur.
Nos super praemissis omnibus tuis et haeredum tuorum praecavere dispendiis et utilitatibus consulere intendentes, tenore praesentium recognoscimus et fatemur praedicta homagium ligium, ac plenum vassallagium, et fidelitatis iuramentum pro dicto regno Sardiniae et Corsicae per dictum Ferrarium militem, procuratorem et nuntium tuum ad hoc specialiter constitutum et speciale mandatum habentem, infra tempus debitum nobis, et eidem Ecclesiae, procuratorio nomine tuo, fuisse fideliter praestita, et a nobis recepta de gratia speciali; nec non huiusmodi confessionem et recognitionem, promissionem et obbligationes per dictas patentes literas tuas aurea tua bulla munitas, infra tempus debitum te fecisse, quas quidem literas tuas, nobis ex parte tua per dictum militem assignatas, recepimus, et faciemus in archivio eiusdem Romanae Ecclesiae custodiri. Per praemissam vero receptionem homagii ligii, ac pleni vassallagii, et fidelitatis juramenti, praestitorum et factorum per dictum militem nomine tuo nobis, et eidem Romanae Ecclesiae, ut praefertur, non intendimus dictis conventionibus, conditionibus sive pactis, modo, formae, et tenori in literis ejusdem praedecessoris Bonifacii comprehensis aliquatenus derogare. Nulli ergo etc. Datum Avinioni XIII. kalendas januarii, anno I.