Filippo II re di Castiglia e di Aragona approva i capitoli o domande votati dai tre bracci del Parlamento celebrato in Sardegna sotto la presidenza del vicerè Don Alvaro de Madrigal.
(1565. – 5 aprile).
Dall’Archivio dell’antico Regio Patrimonio di Sardegna, Cod. Cart., fol. 154 e seg.
Nos Philippus Dei gratia Rex Castellae, Aragonum, Legionis, Siciliae, Hierusalem, Hungariae, Dalmatiae, Croatiae, Navarrae, Granatae, Toleti, Valentiae, Galitiae, Majoricarum, Hispalis, Sardiniae, Cordubae, Corsicae, Murciae, Giennis, Algarbii, Algezirae, Gibraltaris, Insularum Canariae, nec non Insularum Indarum, et Terrae firmae, maris Oceani, Archidux Austriae, Dux Burgundiae, Brabantiae, et Mediolani, Comes Barchinonae, Flandriae, et Tirolis, Dominus Viscayae, et Molinae, Dux Athenarum, et Neopatriae, Comes Rossilionis, et Ceritaniae, Marchio Oristani, et Gociani. Fuerunt per te nobilem, et dilectum nostrum Don Franciscum Sapata Alcaidum civitatis, et Castri Caralis et Sindicum Stamenti militaris Regni Sardiniae pro parte trium Stamentorum dicti Regni coram Majestate nostra oblata, et humiliter praesentata capitula per ipsa tractata in Parlamento per spectabilem Don Alvarum de Madrigal, Locumtenentem generalem nostrum, ac vice et nomine nostri regnicolis ejusdem Regni indito, et celebrato, una cum responsionibus in calce cujuslibet capituli per dictum Locumtenentem generalem factis, humiliter supplicando ut capitula praedicta decretare, acceptare, concedere de nostra solita benignitate dignaremur. Nos vero volentes utilitati, ac conservationi Stamentorum praedictorum, ac Regni nostri praefati, prout aequum est, consulere, capitula ipsa per dictum Alcaidum coram nobis oblata recognosci fecimus in nostro Sacro, Supremo, Regio Consilio, ipsisque responderi mandavimus, prout in calce uniuncujusque capituli continetur, quorum quidem petitionum, capitulorum, et decretationum series sequitur sub his verbis (1) …
Qua quidem capitula praeinserta juxta responsiones, et decretationes in eisdem appositas laudantes, et approbantes, illa, et in eis contenta, et expressa praenominato Stamento militari thenore hujusmodi, de nostra certa scientia, deliberate, et consulto, dicti nostri Sacri, Supremi, Regii Consilii deliberatione praeeunte, concedimus, consentimus, et liberaliter elargimur, nostraeque hujusmodi concessionis, consensus, elargitionis munimine, seu praesidio roboramus, et validamus, auctoritatemque nostram Regiam interponimus pariter et decretum. Serenissimo propterea Carolo Principi Asturiarum, et Gerundae, Duci Calabriae, et Montis Albi, filio primogenito nostro charissimo, et post foelices et longaevos dies nostros, in omnibus regnis et dominiis nostris, Deo propitio, immediato haeredi, et legitimo successori intentum aperientes nostrum sub paternae benedictionis obtentu dicimus; Spectabili vero, Nobilibus et Magnificis dilectis Consiliariis Locumtenenti et Capitaneo Generali in praedicto nostro Sardiniae Regno, Regenti Cancellariam, Judici Regiae Curiae, et Advocato fiscali, Gubernatoribus quoque, seu Reformatoribus in Capitibus Calaris, Gallurae, et Logudorii, Regio Procuratori, ac Magistro Rationali, Alguaziriis, Potestatibus, Virgariis, et Portariis, caeterisque aliis officialibus, et subditis nostris in dicto regno Sardiniae constitutis et constituendis, praecipimus et jubemus, ad incursum nostrae indignationis et irae, poenaeque florenorum auri Aragonum decem mille nostris inferendorum aerariis, ut capitula praeinserta, et unumquodque eorum, juxta decretationum, et responsionum in fine cujuscumque contentarum seriem, et tenorem, teneant firmiter, et observent, tenerique, et inviolabiliter observari per quos deceat faciant; cauti secus agere, fierique permittere aliqua ratione, seu causa; si dictus Serenissimus Princeps nobis morem gerere, caeteri vero Officiales et subditi nostri, praeter irae et indignationis nostrae incursum, poenam praeappositam cupiunt evitare. In cujus rei testimonium praesentem fieri, et in processu dicti Parlamenti inseri, sigilloque nostro Regio majori pendente communiri jussimus. Datum in Monasterio de Esperansa, die octavo mensis Aprilis, anno a Nativitate Domini millesimo quingentesimo sexagesimo quinto, regnorumque nostrorum, videlicet citerioris Siciliae duodecimo, Hispaniarum vero et aliorum decimo.
Yo el Rey.
Vid. Don Bernardus Vicecancellarius Vid. Loris Regens
Vid. Comes Generale Thesaurarius Vid. Sentis Regens
Vid. Soro Regens.
Vid. Clemens pro Conservatore generale
In Sardiniae VI, fol. 131.
Dominus Rex mandavit mihi Michaeli Gort, visa per Vicecancellarius, Generale Thesaurarius, etc. etc.
(1) Sieguono per extensum li quarantasette capitoli presentati all’approvazione sovrana dal deputato del Parlamento. Venti dei medesimi erano stati votati dai tre Bracci, e ventisette dal solo Stamento militare. Ne furono approvati tredici dei primi e diecinove dei secondi.